Latinoamerikan egindako hainbat erreportajeren bitartez, Ander Izagirre kazetariak eskualde hartako zertzelada batzuk ekarriko dizkigu: Mexikoko mendietan desagertzear dauden hizkuntzak eta kulturak, zabortegi baten magalean sortutako haur-orkestra, itsasoaren igoeraren mehatxupean bizi diren Panamako uhartetarrak, Kolonbiako gatazkari aurre egin dioten pertsonak, Boliviako aztarnategi harrigarri bat, emakume futbolari guaraniarren golik onenak… Hiria, natura, gatazka, kirola, oinazea eta poza.

ANDER IZAGIRREk (Donostia, 1976) nazioarteko gaiak eta bidaia kronikak idatzi ditu komunikabideetan eta hainbat liburutan (‘Potosí’, ‘Los sótanos del mundo’, ‘Cansasuelos’, ‘Txernobil txiki bat etxe bakoitzean’…). Lan horiengatik Europako Kazetaritza Saria, Euskadi Literatur Saria eta Kapuscinski Saria jaso ditu, besteak beste.