Aurten, Indonesia, Korea, Letonia, Alemania, Eslovenia, Italia eta Erresuma Batuko abesbatzak hartuko ditugu; Polifonia eta Folklore kategorietan lehiatuko dira. Haurren kategorian, Bulgaria, Indonesia eta Txekiako Errepublikako abesbatzak zein Granadako “Pequeñas voces de La Alhambra” abesbatza hartuko ditugu.

Lehiaketaren atariko gisa, kontzertu berezi bat egingo da hilaren 24an, larunbatean, Jesuitinen kaperan. KEA Ahots Taldeak, Easo Abesbatzak eta Marco Socías gitarra-jotzaileak parte hartuko dute ekitaldian; horren bidez, Pablo Sorozabalen abesbatza-musikako CD berria aurkeztuko da, KEA Ahots Taldeak bultzatutako proiektua baita. Horrez gain, ‘Pablo Sorozábal: Abesbatza-musika’ liburua aurkeztuko da; Euskal Herriko Abesbatzen Konfederazioaren eskutk.

Urriaren 29an egingo den Abesbatza Lehiaketaren lehen saioan, Alemania, Indonesia eta Esloveniako ganbera-abesbatzek jardungo dute Polifonia eta Folklore kategorietan. Hurrengo egunean, Korea, Erresuma Batua eta Letoniako abesbatzek kategoria horietan bertan parte hartuko dute.

Hilaren 31n, larunbatean, haur-abesbatzen emanaldiak izango dira: Pequeñas Voces de La Alhambra (Espainia), Bulgariako Irrati Nazionaleko Haur Abesbatza (Bulgaria), Kajetán (Txekiako Errepublika) eta Saint Angela Abesbatza (Indonesia). Arratsaldean, Alemania, Italia eta Esloveniako abesbatzen emanaldi gehiago izango dira Polifonia eta Folklore kategorietan. Jarraian Suediako Stockholmeko Sofia Vokalensemble taldeak kontzertu berezia eskainiko du San Frantzisko elizan, Arvo Pärt-en ‘Kanon Pokajanen’ obra interpretatuz.

Amaiera-saioa eta sari-banaketa azaroaren 1ean, igandean izango da.

Lehiaketarako sarreren salmenta urriaren 13an hasiko da, baita urriak 24 eta 31ko kontzertu berezietakoena ere.