Suhar korua osatzen dugunok urte andana daramagu Tolosako Abesbatza Lehiaketara etortzen, bai entzule gisa edo abeslari moduan. Bertan, mundu osotik etorritako koruak entzun ahal izan ditugu, planetako baz-ter guztietako musikaz gozatu ahal izan dugu, proposamen berezi eta bitxiak deskubritu ditugu… eta horrek izugarri aberastu gaitu. Era berean, hemen izan diren koruetako abeslariek, gure herria, gure musika eta gure ohiturak ezagutu dituzte, eta Euskal Herriaren zatitxo bat eraman dute bueltan beren herrialdeetara.
Hori da “Tolosa”k duen altxor berezienetako bat: mundu osotik gurera dakarten kultur ondarea, eta gure etxetik beraienera daramatena. Eta hauxe da, hain zuzen, gaur aurkezten dizuegun programaren ardatza. Lehen zatian, mundu osoko konpositoreen musika entzungo dugu, lehiaketan sarritan entzuten ditugun konpositoreen musika, atzerriko abesbatzek ekarri ohi digutena. Bigarren zatian, aldiz, gure etxeko konpo-sitoreek idatziriko obrak eskainiko dizkizuegu, lehiaketara datozen abesbatzek nahitaez abestu behar izaten dituzten horietakoak, eta ondoren, beraien errepertorioetan txertatu ohi dituztenak.
Aurtengoa, egoerak hala behartuta, “lehiaketa” guztiz ezohikoa izan da. Espero dezagun, datorren ur-tean berriz, egoerak ahalbidetuko digula koru-musika mundutik etxera gerturatzen, eta gure etxetik mun-dura zabaltzen.